Inay, May Manananggal Sa Bubong

Inay, may manananggal po sa may bubong!
Dumungaw ako kani-kanina ng marinig ang ugong
at aking namalasan ang tampalasang maligno.

Mula sa pawid na kisame, sumilip ang anino
na waring naniniktik at nag-aabang ng kung ano.
Nagtago ako sa ilalim ng lamesang may bagoong
habang naghihintay ng paparating na tulong.

Nanigas po ako’t nawalan na ng pagkakataon
upang agad kayong masabihan bago pa maglaon.
Nagsitayuan po kasi ang aking mga balahibo
ng makapasok ng ating bahay itong aswang na kalbo.

Diyoskopo! Inay kung nakita lamang ninyo
ay tiyak na magugulat din sa matipunong anyo.
Mukha ng manananggal ay sa isang Manileño
Kaiba sa malimit na paglalarawan sa kwento.

Malayo man ay nawari kong nagmamadali ito
kaya siguro nalimutang paghiwalayin ang buto.
Dahan-dahan siyang lumibot at sa kana’y lumiko;
Pumasok ang aswang sa kwarto ni Ate Biko.

Kumabig ng matulin, ng walang tigil, ang puso ko.
Iniyakan ang sasapitin ng ate sa kanyang kuko.
Kung kaya’t kinagat ko ang nanginginig na braso,
kumuha ng tubong pamalo at sinugod ang asal-aso

Binuksan ko ang pinto at sa kanyang laking gulat
manananggal na naglalangis ay biglaang nagmulat.
Ngunit huli na ang lahat dahil si ate’y tila nakagat;
Tumutulong husto ang laway sa kayumangging balat.

Naiintindihan kong buhay ay sadyang salat
dahil itong si ate hinawakan ang kanyang balikat,
sabay takas kasama ng manananggal;
sumama ba naman doon sa walang dangal.

Nang makarating kayo, inay, sa kwarto ni ate
ay tapos na ang mga mainit na pangyayari.
Tinangay na siya ng aswang galing dito sa Cavite,
Isang manananggal, isang halimaw na buwitre.